Liangmai Sports 2010, Delhi

Liangmai sports meet Delhi 2010 hai Chagahiu jengtung 9th nai P.G.D.A.V. College, Nehru Nagar ga kamkhe chiu rangkhaibo nai nchamjiu tathui luboga chunwibo cham khatdi thonkiu bocham mathiu khuga madu khai-e. khatdi P.G.D.A.V. college gu administration tudi thonkiu de. Siga Manu. Agabou Daimai niu chagiangpi thiu khai-e. Npuimai nai npiumai leng tam tam bo mathen wajiu khai lujiu mathen khai mide. Mathen sura leng Manu. Kaikhamang Daimai (Rtd. Joint Director TRI, Manipur) niu kakheng thiu khai jiu mathen lepad khaide.
Sports paju wiraleng chiujiu Manu. Marikiumang Wijunamai niu certificate kasem khai bi-e. khatdi Manu. Charingambou Charenamai nai Manu. Tadoubou niu football gu trophy pipad khai bide. Paliu mathiu tudi thonkiu de.
Haibo tingmik nai Manu. Diponbou kiga alang khai mide. Siga alang khai mimai: 1) Rachel (Kimkhaipui) 2) Akheliu 3) Thoibi 4) Solome 5) Widibou 6) Jacob 7) Dibuanbou 8) Wibamraibou 9) Jaikonang (Ajai) khatdi 10) Karaibou. Chaki pikhai mai khatdi alangkhai mai mathiu tu thonkiu de.
Sports tathui lura leng tasen chalan nkha khai mai khatdi papum katpat jiu changam nkha khai mai mathiu tudi thonkiude. Tanu suwang boga chuncham bo kikhun (Waka United FC) niu football gu tathon lumide. Khatdi Liuna team niu npui maigu football tathon lumide. Mathen hina loi mibosai former MP. Manu. Mani Charenamai, former MDC Manu. ML. Ngamang khatdi Manu Jeremiah Pamei (College Lectureer, DU) paliu niu tathon jan khai bi-e. siniu paliu tudi thonkiu-e.
Kanam thuboga Manu. Agabou Daimai niu kathot khaibo cham din lubosai, Manu. Joshua Wijunamai (Asst. Pastor, LCFD) niu kariang khaibo rathoi lukhai lujiu mathiu niu katiu tiu ncham lu npek khai de.

Prepared by
Sports Committee, 2010